3, 2, 1... 2012!

O reloxo da Porta do Sol

Remataron a semana de vacacións, pasou voando. Visitar a familiares e amigos, poñer unhas vacinas, mercar algunhas cousas e facer algunhas xestións que tiña pendentes foi todo canto me deu tempo facer nestes días. Quedoume moita xente pendente por ver, polo que algo de pena tamén me queda por non ter estado con todos os que me gustaría...

O peor, as horas de viaxe e as interminables escalas. O día de noiteboa pasei 9 horas en Madrid entre voo e voo, así que optei por pasear un pouco pola cidade e sacarme unha foto co protagonista indiscutible da noite pasada: o reloxo da Porta do Sol. Non tiña moitas ganas de improvisar, así que decidín rememorar as miñas últimas visitas a Madrid e visitei sitio por sitio os rincóns que xa coñecía... Pagou a pena o paseo.

Pero o que me queda na retina destas viaxes é a imaxe da T4 baleira. É o que ten viaxar en días tan especiais coma o 24 de decembro e o 1 de xaneiro...

Nin un alma na T4 (24-12-2011)

Fin da primeira parte

Quen di que pasaron rápido? Para min estes 3 meses e medio foron intensos e pareceron anos... Pero acabou por chegar o momento de facer a maleta e voltar a Cangas para atoparme coa miña vida de sempre, ou o que queda dela...

Por diante pouco máis dunha semana para reencontrarme con familia e amigos antes voltar a este país, que tanto me deu e tanto me quitou, para pasar outros 8 meses nos que rir, chorar, coñecer, desfrutar, sufrir, sair, viaxar e, sobre todo, aprender máis sobre min mesmo.

Fin da primeira parte.